فقاص مغربي ناجح ومضمون
مقادير 3 بيضـات كاس سكر سنيدة كاس زيــت
نصف كـاس الحليـب شوية زنجلان+نافع+زبيب مقطع
لوز يكون مرطب ليلة من قبل ومقسوم على 2(هذا سر الأول باش مايتهرسش الفقاص في تقطاع) 1خمـــارة دقيــق فورص حسب الخليط
طريقة تحضير تنخلطو جميع المقادير ونضيفو دقيق في الاخير مع الخمارة والعجين تكون رطبة فاش نبغيو نخدمو الحرابل ندهنو يدينا بالزيت باش ماتلصقش و تكون ساهلة في الخدمة ونكرصوهم غيــر شوية باش ماتشققش لينا الحرابل ندهنوهم بصفار بيضة مخلط مع نقيطات الخل و نيسكافي ونزوقوهم بخطوط بالفورشيط وندخلهم الفرن يكون مسخن من قبل حتى يتحمر من التحت ونشعلو عليه الفوق باش يتحمر تكون العافية مهيلة باش يطيب من الداخل فاش نخرجوه نغطيوه بزيـف يكون فازك ونخليوه ؛(انا درتو في الصباح وخليتو حتى الليل عاد قطعتو)
السر الثاني و هو المهم باش مايتهرس ليكم الفقاص هو تقطعوه بموس يكون رقيق و ماضي انا حتى تفرتيتة ما كانت في تقطاع كلو جا مقاد وماتهرش ليا نقطعوه وندخلو لفرن مسخن من قبل باش يتحمــر
كيجي رطب و في نفس الوقت مقرمش وبنيـــــــن بالصحة والراحة
متنساوش جييييم + بارطاج لتحتفضي بالوصفة لوقت الحاجة
